Buscamos novas formas de traballo profesionalizando a xestión do parque de alugueiro adaptándoa ao perfil do inquilino, o que permite unha actuación máis adecuada ás situacións particulares e á contorna.

Innovamos nos procesos de xestión e nas formas de interrelacionarnos coas familias, acompañándoas co obxectivo de mellorar a súa situación socioeconómica. Traballamos desenvolvendo metodoloxía Big Data para a cualificación de aspectos de xestión e risco de carteiras de inmobles.

Traballamos para a mellora da capacidade de renda dos inquilinos de alugueiro social a través de diversas actuacións de acción socioeducativa ou de inserción laboral (Contrato Social e Programa de Inserción Laboral), facilitándolles o acceso ás axudas públicas destinadas ao alugueiro e á acción social. En todo caso, subministrándolles as ferramentas para evitar situacións de vulnerabilidade ou, chegada tal situación, empoderándoos para superala.

Somos proactivos e dilixentes na colaboración coas administracións públicas e as entidades e organizacións sociais para a xestión das distintas situacións ou conflitos.

Mantemos estreitos lazos de comunicación coa Administración Pública, sobre todo cos departamentos responsables de Vivenda e de Servizos Sociais, para intercambiar información e traballar conxuntamente naqueles casos de familias vulnerables relacionados co noso parque, buscando un marco de relacións estables e fluídas.

Ao mesmo tempo, no marco da vontade de sermos unha empresa con alta responsabilidade social e integrada na súa contorna social, Sogeviso mantén relacións fluídas e constantes con asociacións de distintos tipos do ámbito social vencelladas á vivenda e ao ámbito sociolaboral.